Psa 95 | TVK | STEP | !Mumei, rimes Iahova! Rikikei mi Hi itel sien vengan xa di nggur xol xir e miteh meulien e xir.

Psalms 95

Ripet Rat His Hi e Riteong Ni

1 !Mumei, rimes Iahova!
Rikikei mi Hi itel sien vengan xa di nggur xol xir e miteh meulien e xir.
2 Rimei visali itel memesien xil nar,
e rikikei mini itel sisien te memaalen.
3 Rapol ni mak vengan xa Iahova, xeihen nan mahulong,
e be suv toto xa mili sein hi tesav xil vus.
4 Ut ngasen e ut etan de hen,
pe huitan duxoh romul hu xil xa be nesao xa be nesao.
5 Tas xa xi pol ni be san,
e tan xa milingi da, de hen.

6 Mumei, rihe tan e rimot mini.
Ritingeiril pe met Iahova xa pol ni xir.
7 Nggoni moletin tei xa di milaxat kuhi sipsip san xil,
xi xa be Hi nar di milaxat kuh xir, moletin nan xil.

Xosali ak, muteong ni naha xa xi biteni:
8 “Munapol ni vatxeih ti naxoni avu namim xil latepol ni e ut Meriba,
naxoni ngan xa latepol ni e melengien nen ak e uruvuol tahal Masah. ^{▼▼95:8 Meriba e Masah lube his lu te rute tei takeres xa Mosis tehas hat e oei testal texo en (Eks 17:1-7).}
9 Avu namim xil ak latehit lasak pis nou,
neta sav xa latele kil holesok xil tuei xa natepol ni ve xil.
10 Huram hanutap lu (40) natesin xil,
vengan xa tine teti sotin ranou e latehit linakil ti vari rae xil navan.
11 Misak ni ieok nggat xil
e natepol ni hitxatien tei teha ni xil xa bit,
‘Musakras muva mungel e rute xa natehit nisa ni mi xamim.'”